Lög og reglur

Skólinn starfar samkvæmt gildandi lögum um grunnskóla og aðalnámskrá grunnskóla. Nánari upplýsingar um lög og gildandi reglugerðir má m.a. finna á vefum:

Kennarasambands Íslands

 http://fg.ki.is/pages/530

Sambands íslenskra sveitarfélaga

http://www.samband.is/verkefnin/skolamal/log-og-reglugerdir/

Skólareglur

Skólareglurnar okkar voru settar í samráði við nemendur, foreldra og kennara árið 2001.

Til þess að skólinn verði öruggur og eftirsóknarverður vinnustaður og skólastarfið skili ásættanlegum árangri þurfum við að hafa eftirfarandi í huga:

• Almenn háttvísi í samskiptum er nauðsynleg. Orðfæri á að vanda sem og alla framkomu.
• Stundvísi og ástundun náms eru dyggðir sem allir eiga að tileinka sér.
• Nemendur hlýði tilmælum starfsfólks.
• Ágreining skal útkljá af sáttarhug.
• Nemendur sýni eigin eigum virðingu og einnig eigum annarra og skólans.
• Nemendur komi eingöngu með þann útbúnað í skólann sem tengist skólahaldinu nema að starfsmenn skólans heimili annað.
• Nemendur fylgi settum öryggis- og umgengnisreglum.
• Neysla á sælgæti og gosdrykkjum er öllu jafna óheimil á skólatíma.
• Tóbaks- og áfengisneysla nemenda sem og önnur vímuefnanotkun er stranglega bönnuð.

Ofangreindar reglur gilda einnig utan skólans þar sem nemendur eru í hans nafni, svo sem á ferðalögum, skemmtunum og þess háttar.

Til að öryggis sé gætt skulu nemendur:

• mæta búnir í skólann eftir veðurfari.
• ekki mæta með neitt það í skólann sem hættulegt getur talist.
• ekki koma á vélknúnum ökutækjum í skólann sem þeir sjálfir stjórna.
• halda sig á leik- og íþróttavöllum við skólann.
• við félagsstörf halda sig innan dyra nema að starfsmaður á vakt heimili annað.
• á hjólabrettum, reiðhjólum, línuskautum og öðru slíku gæta þess að öðrum stafi ekki hætta af umferð þeirra. Munið hjálma og hlífar samkvæmt gildandi umferðarreglum.
• fylgja fyrirmælum starfsfólks skólans. Sérstaklega er það mikilvægt þar sem umgangast þarf vélar, tæki og annan búnað.
• sýna aðgát við skólabíla og virða ábendingar starfsfólks og bílstjóra.
• sitja með bílbeltin spennt í skólabílnum. Þau má ekki losa fyrr en bíllinn hefur numið staðar þar sem viðkomandi fer út úr honum.

Umgengnisreglur

Tillitssemi og snyrtimennska auðvelda okkur öllum að eiga farsælan dag í skólanum.

• Allir fari úr útiskóm á mottu í andyri, gangi frá þeim í hillur og hengi yfirhafnir á snaga.
• Töskur og pokar fari á viðeigandi staði.
• Notkun tyggigúmmís er bönnuð á skólatíma.
• Forðast skal hlaup og háreysti innan dyra.
• Í matsal skal fylgja almennum borðsiðum og ganga á frá eftir sig. Engar húfur og yfirhafnir þar.
• Mat á ekki að bera úr matsalnum til neyslu annars staðar í skólanum.
• Í tölvuveri má eingöngu vera í forritum og efni sem eru innan almennra siðgæðismarka.
• Nemendum sem hafa aðgang að tölvum, sal Ýdala, æfingaaðstöðu og öðru slíku ber að fylgja settri dagskipan.
• Í leikjum á að sýna drengskap og kurteisi.

Kennarar geta sett umgengnisreglur sem gilda í þeirra tímum og stofum. Þær þarf að kynna foreldrum og nemendum sérstaklega.

Ef út af bregður

Ef nemandi getur ekki einhverra hluta vegna farið eftir reglum skólans skal meta það í ljósi aðstæðna og eftir eðli málsins. Í flestum tilfellum fer eftirfarandi atburðarrás af stað:

• Í fyrstu er nemandi áminntur af viðkomandi starfsmanni.
• Ef nemandi lætur sér ekki segjast er haft samband við umsjónarkennara sem ræðir við nemandann um hegðun hans og framkomu. Á þessum tímapunkti þarf nemandi eða kennari stundum að hafa samband við forráðamenn og tilkynna þeim málavexti.
• Ef málið er alvarlegt eða brýnt hefur umsjónarkennari eða skólastjóri samband við forráðamenn.
• Ef nemanda er vísað úr tíma ræðir skólastjóri, viðkomandi kennari og/eða umsjónarkennari við nemandann. Slíkt skal tilkynna skólastjóra.
• Ef nemandi getur ekki sótt skóla tímabundið sökum framkomu sinnar og hegðunar skal strax tilkynna það forráðamönnum og fræðslunefnd. Skólinn treystir sér ekki að taka viðkomandi nemanda inn í skólann aftur fyrr en forráðamenn og nemandinn hafa rætt málið við skólastjóra og umsjónarkennara.
• Í mjög alvarlegum tilfellum þar sem skólinn treystir sér alls ekki til þess að bera ábyrgð á viðkomandi nemanda er málinu vísað til barnaverndarnefndar og fræðslunefndar til úrlausnar.
• Mál sem talin eru varða við hegningarlög eru tilkynnt lögreglu og/eða barnaverndarnefnd.

Athugið!

Nemendur sem ekki fylgja settum reglum geta ekki vænst að fá að taka þátt í félagslífi skólans eða nota félagsaðstöðu og þess háttar.