Wasichana Marimba
Hljómsveitin Wasichana Marimba, sem er skipuð sjö stúlkum af unglingastigi Hafralækjarskóla, gerði víðreisn á höfuðborgarsvæðinu í októberlok. Hljómsveitin lék í Aðalútibúi Landsbankans í Austurstræti á föstudeginum og síðar þann dag í Hörpunni á hátíðartónleikum Tónmenntakennarafélags Íslands. Þá voru stúlkurnar með námskeið fyrir nemendur í Álftamýrarskóla og á laugardeginum léku þær á dvalarheimilinu Hrafnistu í Reykjavík.
Að sögn Guðna Bragasonar deildarstjóra tónlistardeildar Hafralækjarskóla fengu stúlkurnar frábærar viðtökur þar sem þær komu fram. Húsfyllir var í Norðurljósasal Hörpunnar og mikil stemming en á milli 300 - 400 börn komu fram á tónleikunum. Marimbahópurinn frá Hafralækjarskóla var sérstakur gestur hátíðarinnar og var það atriði sem kom lengst að og í stuttu máli þá heilluðu stúlkurnar áhorfendur með flottum leik og líflegri sviðsframkomu.
Frétt af 640.is